民記年度漢字又嚟喇 頭、二獎有伏 三獎好眼熟

　　年年民建聯（民記）都會整返個年度漢字選舉，話畀市民「公投」最代表到呢一年嘅漢字喎！Jenny仲記得上年係個「貴」字，負責公布結果嘅張國鈞仲話，皆因香港乜都貴呀嘛！今年又係咩字呢？Jenny只可以話，結果真係估你唔到……

要揀就揀「順」「民」

　　今年就唔係張國鈞公布，而係搵咗民記元老、立法會前主席曾鈺成噃！今年嘅候選漢字就有「順」、「民」、「樓」、「公」、「風」、「通」、「守」、「地」、「禁」、「判」，結果就係個「順」字以5838票當選，高過第二名嘅「民」字差唔多成倍吖！曾前主席仲即席揮毫，親手將個年度漢字寫出嚟貼上去添！

　　曾前主席就話，今年市民揀個「順」字出嚟，相信每個人都有唔同嘅準則，就好似第二同第三名嘅「民」同「樓」，就可能係市民希望民生做好啲、解決到住屋嘅問題；又或者好似上年嘅「貴」同埋前年嘅「亂」，冇人鐘意「貴」同「亂」，但係市民就覺得呢兩個字反映到呢兩年嘅社會，都會揀佢哋做年度漢字，所以今年嘅「順」字，有可能係代表社會嘅現象，又或者係市民嘅願望。

港航送機票？ 不如抽部華為好少少

　　曾前主席仲引《說文解字》話，「順之，所以理之，未有不順民情而能理者也」，即係話如果管治者不順民情，係唔可以管理好個社會嘅，亦都相信市民揀呢個字，不只想而家「順」，未來都要繼續「順」喎！

　　按照慣例參加投選嘅市民都有得參加大抽獎，但留意返，頭獎同二獎嘅獎品都係由香港航空送出㗎，港航近排發生咩事大家都知喇……Jenny仲收到最新消息，佢哋嘅首席運營官都認「公司正渡過少少困難」。所以如果中咗嘅話，都係要快啲祈求港航「順」利過難關喇！

　　望望個三獎先，咦！又係你呀？華為！原來民記仲學埋新民黨葉劉，拎咗部華為手機出嚟抽！如果一個唔好彩港航有咩事，三獎就變頭獎，得獎者順手愛埋國！Prefect池！